BirdLife Hordaland
Bergen BirdLife på tur til Herdla
Kvart år i slutten av august skal det helst vere fullt «trøkk» med vadarar på Herdla. Så første haust- eller siste sommartur i BirdLife Bergen lokallag gjekk også i år dit.
Av Anders Heien
Publisert 27.08.2023
Heile 31 tobeinte og ein firbeint deltakar møtte optimistisk opp på Herdla fort laurdag 26.8. Dagen starta med litt hustrete og vått «haustver», men enda i sol med god sommartemperatur og mange kjekke fugleobservasjonar.. Første inspeksjon føregjekk før kl 8.00 på golfbanen, og der var det godt med linerler og ein del sandlo og brusfugl. På Valen beita flokkar med heilo og brusfugl, nokså likt fordelt med knapt 400 av kvar art. Ca 100 enkeltbekkasin, 30 myrsniper, nokre få polarsniper, viper, tjeld, storspovar, dvergsniper, lappspovar og ein grønnstilk blei og sett. Ei varslande gluttsnipe på veg sør var siste vadar i rekka då me kom opp til fortet for loggskriving.
Det blei og sett andre og sjeldnare artar på turen. Medan alle var opptekne med vadefugl, var det vår einaste portugisiske deltakar, Estela, som varsla oss om ein egretthegre som trekte austover ved Urdneset, dette til stor anerkjenning frå dei godt eldre og durkdrevne deltakarane. Også ein storlom låg på fint hald utafor Prestvika og blei sett av alle.
Dag leia den store flokken trygt rundt på Herdla, og som vanleg tok Terje ansvar for tal og artsliste, 49 sto på den denne dagen.
